Алматы мен Италия арасындағы опералық көпір: Teatro Petruzzelli Қазақстанда жобасын іске қосуда

Атақты еуропалық театр мен Абай атындағы ҚазҰОБТ бірлескен қойылым ұсынады

Алматы – ірі музыкалық оқиғаның орталығында. Еуропаның ең беделді театрларының бірі – Teatro Petruzzelli – Қазақстанда Абай атындағы Қазақ ұлттық опера және балет театрымен бірлесіп білім беру және қойылым жобасын іске қосуда. Ынтымақтастықтың шарықтау шегі белканто дәуірінің ең жарқын туындыларының бірі – «Алжирдегі итальянка» операсының қойылымы болмақ, деп хабарлайды Almaty.tv.

Алматыда бірегей халықаралық жоба бастау алды. Teatro Petruzzelli мен Абай атындағы Қазақ ұлттық опера және балет театры тек спектакль ғана емес, толыққанды опералық шеберлік мектебін қалыптастыру үшін күш біріктіруде. Бастаманы Қазақстан Республикасындағы Италия Елшілігі мен Алматыдағы Италия мәдениет институты қолдайды.

«Алматыда болып, осы жобаның басталуына қатысу мен үшін үлкен қуаныш. Бұл тек келесі жылы қойылатын спектакль ғана емес. Жоба аясында резиденциялар ұйымдастырылып, итальяндық және қазақстандық әртістер өзара тәжірибе алмасады. Менің ойымша, бұл – бастаманың ең басты құндылығы. Мұндай жобалар бір ғана шарамен шектелмей, болашақта жемісін беретін негіз қалайды», – деді Қазақстандағы Италияның Төтенше және Өкілетті Елшісі Антонелло Де Риу.

Жоба дәстүрлі шеберлік сабақтарының шеңберінен шығып, толыққанды опералық копродукцияны жүзеге асыруды көздейді. Бұл серіктес театрға қойылымды жүзеге асыру үшін қажетті барлық көркемдік және өндірістік материалдарды беруді қамтиды. Жобаның режиссері – Джандоменико Ваккари.

«Біз бүгін Джоаккино Россинидің әйгілі «Алжирдегі итальянка» операсының қойылымына негіз қалау үшін жиналдық. Бұл – 1813 жылы жазылған туынды, бірақ оны көргенде оның бүгінгі күнмен қаншалықты үндес екенін түсінесіздер. Россини музыкасы – Қазақстандағы Италия мәдениетінің елшісі іспетті және екі ел арасындағы мәдени байланысты нығайтатын көпір», – деді режиссер Джандоменико Ваккари.

«Біз Алматыдағы Италия мәдениет институтымен бірнеше жылдан бері тығыз ынтымақтастық орнатып келеміз. Ақпан айында Италиядағы Teatro Petruzzelli сахнасында бірлескен жобамыз жүзеге асты. Сонымен қатар өткен жылдың қыркүйегінен бастап итальяндық мамандар тұрақты түрде шеберлік сабақтарын өткізіп келеді. Дәл осы кездесулер барысында жас орындаушылардың қатысуымен жаңа опера жасау идеясы туындады», – деді Абай атындағы ҚазҰОБТ директоры Айнур Қопбасарова.

Білім беру бағдарламасы осы жылдың күзінде өтеді және Қазақстанның маңызды мәдени орталықтарының бірі – Абай театры сахнасындағы премьерамен аяқталады. «Алжирдегі итальянка» операсының премьерасы келесі жылға жоспарланған. Ұйымдастырушылар атап өткендей, бұл жоба – мәдениеттер диалогы мен кәсіби алмасудың маңызды бөлігі.