Алматыда Әбдіжәміл Нұрпейісовтің «Қан мен тер» романы негізінде қойылған балет көрсетіледі
Атақты трилогия балет сахнасында алғаш рет өмірге келеді
XX ғасырдағы қазақ әдебиетінің көрнекті өкілдерінің бірі Әбдіжәміл Нұрпейісовтің «Қан мен тер» роман-трилогиясы қазақ әдебиетінің классикалық шығармаларының қатарынан берік орын алып, театр сахнасында талай мәрте қойылымға арқау болған. Алайда бұл шығарма желісі бойынша балет әлі күнге дейін қойылған емес.
Алматыдағы Абай атындағы Қазақ ұлттық опера және балет театры 93-ші театр маусымын «Ақбала» балетінің премьерасымен ашады. Қойылым авторлары хореография тілі арқылы кейіпкерлердің ішкі жан дүниесін, сезім-толғанысын, басынан өткерген қасіреті мен үмітін жеткізеді.
Спектакльде Арал қасіреті тақырыбына ерекше орын берілген. Себебі трилогия авторы Әбдіжәміл Нұрпейісовтің өзі Арал өңірінде дүниеге келген. Теңіз, ана, қираған шаңырақ және біртіндеп жоғалып бара жатқан өмір бейнелері қойылымның маңызды символдарына айналады. Осы арқылы кейіпкерлердің жеке тағдыры тұтас бір дәуірдің драмасымен астасатын көпқабатты сахналық әлем қалыптасады.
Балеттің хореограф-қоюшысы – Аршак Галумян. Ол 2004 жылдан бері Берлинде еңбек етіп келеді. Көп жыл бойы Берлин мемлекеттік балетінің солисі болған хореограф қазіргі уақытта Berlin Ballet Company компаниясының қосалқы директоры қызметін атқарады.
«Мен әрдайым жаңа дүниені іздеумен жүремін. Ал жаңа нәрсені табудың ең жақсы жолы – мәдениет пен халық фольклорына жүгіну. Бұл көрерменді түрлі эмоциялық күйді бастан өткеретін басқа бір әлемге жетелейді. Кейіпкерлердің тарихы мен сезімдерін бүгінгі күннің көзімен көрсету маған қызықты болды».
— Аршак Галумян
Аршак Галумянның балет өнеріне заманауи әрі тың көзқарасы бар екенін оның бұған дейінгі жұмыстары да аңғартады. Мәселен, ол Berlin Ballet Company әріптестерімен бірге A Techno Ballet Odyssey қойылымын, яғни техно-балетті сахналаған. Қойылым алғаш рет Сербияда ұсынылып, кейін Германияның Берлин, Баден-Баден және Кёльн қалаларындағы сахналарда жалғасын тапты.
Сондықтан «Ақбаланың» қандай көркемдік шешіммен сахналанғаны да көрермен үшін ерекше қызығушылық тудырары сөзсіз.
Балет қойылымымен бірге шығармашылық топта:
Композитор: Аружан Октябрь
Дирижер-қоюшы: Нұржан Байбусинов, Қазақстанның еңбек сіңірген қайраткері
Либретто авторы: Шынар Омарова
Бас хормейстер: Әлия Темірбекова, Қазақстанның еңбек сіңірген қайраткері
Сценограф: Элеонора Перонетти (Италия)
«Ақбала» балетінің премьерасы 12–13 қыркүйекте өтеді. Билеттер сатылымда.