«Би де билейміз, ән де саламыз»: әртістер жаңа шығармашылық маусым туралы
Анвара САДЫКОВА, Ерназар ЖУБАН және Нурбол АРТЫКБАЕВ биылғы жазды демалысқа емес, көрермендерін қуантуға дайындықпен өткізгендерін айтып берді.
Биыл жаңарған «Гүлдер» ансамблі аты аңызға айналған шығармашылық ұжымның қайта жаңғыруынан кейінгі бесінші маусымын атап өтеді.
– Біздегі шығармашылық маусым тамыз айында-ақ басталды. Алғашқы маңызды әрі күрделі жобамыз – Қырғызстанда өтіп жатқан VI Дүниежүзілік көшпенділер ойындары аясындағы халықаралық Nomad Fest фестиваліне ауқымды дайындық жұмыстарын жүргіздік. Қазіргі таңда 22 адамнан тұратын би құрамымыз Мәдениет және ақпарат министрлігі мен Роза Бағланова атындағы «Қазақконцерт» мемлекеттік академиялық концерттік ұйымы басшылығының қолдауымен осы фестивальге қатысып жатыр, – дейді телефон арқылы «Гүлдер» ансамблінің бас балетмейстері, белгілі хореограф Анвара Садыкова. – Сонымен қатар, мұнда 14 хореографиялық қойылымнан тұратын бағдарламамен, оның ішінде байқаудан тыс нөмірді де қамтып, «Этноби» халықаралық байқауына қатысудамыз.
Nomad Fest фестивалінің салтанатты ашылуында «Гүлдер» ансамблі Еркегали РАХМАДИЕВтің музыкасына қойылған «Дайрабай» хореографиялық композициясын орындады. Фестиваль сахнасында тегі қазақ француз хореографы Дана МУСАНЫҢ қойылымы – «Қан» композициясының премьерасы өтті. Бұл шығарма барша түркі халықтарын біріктіретін ортақ ДНҚ туралы философиялық толғанысқа құрылған.
Байқаудың алғашқы турында ансамбль «Тұран» ансамблінің музыкасына қойылған белгілі «Ер Тұран» хореографиялық қойылымын орындады. Ал екінші кезеңде қобызды дүниеге әкелген Қорқыт туралы аңызға негізделген, STEPPE SONS тобының музыкасына қойылған «Қорқыт» композициясын ұсынады.
– Сонымен қатар біз үшін жаңа бағыттағы музыкалық-хореографиялық жобамен де жұмыс істедік. Ол тамыз айының соңында Астана қаласында «Қазақконцерт» базасында өткен 79-шы Coupe Mondiale аккордеоншылар байқауы аясында көрермен назарына ұсынылды, – дейді Анвара Ариповна. – Командамыздың тек халықтық-сахналық, ұлттық және эстрадалық билермен ғана шектелмей, спорттық-бал билері мен көше би мәдениетінің түрлі бағыттарын да меңгергенін мақтан тұтамын. Жинақтаған тәжірибеміз бен шығармашылық ізденістеріміздің барлығын осы маусымда көрермендерімізбен бөлісеміз.
Танымал әнші Ерназар Жубан да шығармашылық маусымның басталуын күтпей, продюсері Байғали СЕРКЕБАЕВПЕН бірге жазған АNА атты жаңа әнін жарыққа шығарды.
– Алдағы маусымға келер болсақ, қазір Байғали Ермекұлымен бірге қызу дайындалып жатырмыз: жаңа әндер жазып, жазба жұмыстарын жүргізудеміз. Материалдардың басым бөлігі продюсерімнің қаламынан шыққан. Ал Серкебаевтың нашар ән жазатынын көрген емеспін, – деп күледі Ерназар. – Кейде мен де онымен бірге шығармашылық жұмысқа араласамын, негізінен қазақ тіліндегі мәтіндерді жазамын. Сондықтан сапалы танымал музыканы ұнататын барша тыңдарманымызға жаңа туындыларымызды жіті бақылап отыруды ұсынамын.
Сонымен қатар әнші Алматыда 9 және 10 қазанда өтетін танымал «А-Студио» тобының ауқымды концертіне баруға кеңес береді. Артистің айтуынша, бұл концерт отандық шоу-бизнес үшін айтулы оқиғалардың біріне айналмақ. Себебі аты аңызға айналған топ көрермен алдына жаңа қырынан шығып, қазақ тілінде ән шырқайды.
Концертке Ерназар Жубанмен қатар, Байғали Серкебаев продюсерлік ететін The Jigits тобы да қатысады.
Ал опера әншісі Нурбол Артыкбаев көрермендерді өзінің шығармашылық ордасы – Абай атындағы Қазақ ұлттық опера және балет театрына шақырады.
– Бізде демалыс бір ай болды. Бірақ сол уақытта демалғаннан гөрі дайындықпен көбірек айналыстым. Себебі алдағы уақытта спектакльдердегі жаңа партияларға енуім керек, жаңа рөлдерді меңгеріп жатырмын. Сондықтан жұмыс көп болды, – дейді Нурбол.
Әнші барша көрерменге аты аңызға айналған Опера театрына жиі барып, жаңа қойылымдарды тамашалауға кеңес береді. Әсіресе Джакомо Пуччинидің «Тоска» операсының жаңартылған нұсқасын, театр репертуарындағы жаңа әрі тұрақты көрермендер үшін тосын қойылым – Джоаккино Россинидің «Алжирдегі итальянка» операсын, сондай-ақ заманауи композитор Аружан ОКТЯБРЬДІҢ музыкасына қойылған «Ақбала» балетінің премьерасын ерекше атап өтті.
– Сонымен қатар барлық қазақстандықтар мен елімізге келген қонақтарға көбірек серуендеп, айналаға назар аударуға кеңес беремін. Айналамыз қандай әдемі! – дейді өнерпаз күлімсіреп.