«Опера түні» Алматыда ашық аспан астында 5 мыңнан астам көрерменді жинады
Алматыда Абай атындағы Қазақ ұлттық опера және балет театрының 92-театр маусымын жарқын қорытындылаған ауқымды «Опера түні» жобасы өтті.
Концерт театр алдындағы алаңда Open Air форматында ұйымдастырылып, оған қала тұрғындары мен қонақтарынан 5 мыңнан астам көрермен жиналды. Бір кешке театр алдындағы кеңістік әлемдік және ұлттық опера классикасының жауһарлары шырқалған ашық сахна алаңына айналды.
Жоба Алматының жаңа мәдени тынысының бір бөлігіне айналды. Бұған дейін Мемлекет басшысы Қасым-Жомарт Тоқаев қаланы тұрғындар мен қонақтардың игілігі үшін тәулік бойы қызмет ететін мегаполис ретінде дамыту қажеттігін атап өткен болатын. «Опера түні» қала тұрғындарының ашық қалалық кеңістікте өтетін мәдени іс-шараларға қызығушылығы жоғары екенін көрсетті.
Кеш бағдарламасында «Біржан–Сара», «Абай», «Аида», «Турандот», «Травиата», «Богема», «Севиль шаштаразы», «Норма», «Самсон мен Далила» операларынан және басқа да шығармалардан үзінділер орындалды. Сондай-ақ Карл Орфтың «O Fortuna» туындысы мен әртістер көрермендермен бірге шырқаған «Гүл Алматым» әні шырқалды.
Жобаға театрдың жетекші солистері, хоры мен симфониялық оркестрін қоса алғанда, 200-ден астам әртіс қатысты. Дирижерлік пультте Нуржан Байбусинов пен Куаныш Исмаилов өнер көрсетті. Хорды бас хормейстер Алия Темирбекова дайындады. Режиссерлік жұмысты Наталья Кагадий мен Алуа Сабо жүзеге асырды.