«Халық әуені» Кербұлақта жүректерді біріктірді
21 мамыр күні Қазақстан Республикасы Мәдениет және ақпарат министрлігінің ұйымдастыруымен және «Қазақстан Халық Банкі» АҚ-ның демеушілігімен жүзеге асырылып жатқан ауқымды мәдени жоба – «Халық әуені» аясында бір мезетте еліміздің 17 өңірінде алғашқы концерттер басталды.
Жобаның жарқын оқиғаларының бірі – Кербұлақ аудандық Әбікен Сарыбаев атындағы мәдениет үйінде «Қазақстан Камератасы» мемлекеттік камералық ансамблі мен Абай атындағы Қазақ ұлттық опера және балет театрының әртістерінің концерті болды. Бұл кеш жоғары өнер мерекесіне және ерекше рухани бірлікке айналды.
«Қазақстан Камератасы» ансамблі мен ҚазҰОБТ әртістері үшін еліміз бойынша гастрольдік сапарлар бұрыннан шығармашылық қызметтің маңызды бөлігі болып келеді. Ұжымдар Қазақстанның түрлі өңірлерінде талай рет өнер көрсеткенімен, «Халық әуені» жобасы аясында шағын аудан орталықтарына бару ерекше тәжірибе болды. Мұндай кездесулер көрерменмен жақындықты жаңаша сезінуге, жұртшылықтың шынайы ықыласын көруге және жанды музыканың адамдар үшін қаншалықты маңызды екенін тағы бір мәрте ұғынуға мүмкіндік береді.
Әртістердің Кербұлақ ауданына келген алғашқы сәттерінен-ақ ерекше қонақжайлық пен шынайы құрмет атмосферасы сезілді. Ұйымдастырушылар мен жергілікті тұрғындар шығармашылық ұжымдарды зор ықыласпен қарсы алып, бірден қамқорлық пен ілтипат көрсетті. Әртістер үшін қолайлы жағдай жасалып, концертке дайындықтың барлығы жоғары деңгейде ұйымдастырылды. Іс-шараның өзі де әр бөлшегіне дейін мұқият көңіл бөлінген нағыз қазақы қонақжайлық үлгісінде өтті.
Мәдениет үйінің залы жылы әрі шабыт беретін атмосфераға толы болды. Көрермендер әрбір шығарманы зор ықыласпен, ұзақ қол шапалақпен қарсы алып отырды. Бұл кеште сахна өнерпаздары мен көрермен арасындағы ерекше эмоциялық диалог алаңына айналды.
Концерт бағдарламасына орындаушылар репертуарындағы ең үздік туындылар – халық әндерінің жаңа өңдеулері, әйгілі опералардан ариялар және сүйікті композиторлардың шығармалары енгізілді. Кештің ерекше сәттерінің бірі – көрермендердің концертке белсене араласып, кей шығармаларды бірге қосылып айтуы болды. Әсіресе «Абай» операсынан «Тойбастар» және Шәмші Қалдаяқовтың халық сүйіп тыңдайтын әндері залды бір ортақ әуенге біріктірді.
Әрбір орындау шынайылық пен терең сезімге толы болып, кеңістікті жанды музыка энергиясымен байытты. Ал әртістер өз кезегінде көрермендермен шеберлігін, жылуын және шабытын шын жүректен бөлісті.
Осы ерекше күні мәдениет пен өнер қызметкерлері үшін көрермендермен бірге өнерді бөлісуге Абай атындағы Қазақ ұлттық опера және балет театрының әртістері қатысты: Қазақстанның еңбек сіңірген қайраткері Нұржан Бажекенов, опера солистері Айдос Жабағин, Нұрғалым Аманбай, Әлихан Бейсеков, Шыңғыс Нұрғалиұлы, Диляра Дүйсекеева, Азиза Әбдрейм, Айдана Сатыбаева және Бекзат Әбітов, сондай-ақ Мемлекеттік классикалық музыка ансамблі «Қазақстан Камератасы» әртістері, көркемдік жетекшісі – ҚР халық әртісі Гаухар Мырзабекова.
Бұл кеште музыка адамдарды біріктіріп, ұлттық мәдениетке деген мақтаныш сезімін және өнерге деген сүйіспеншілікті оятты.
«Халық әуені» жобасы өз сапарын Қазақстан өңірлері бойынша жалғастырып, тұрғындарға жоғары өнерге жақындауға мүмкіндік беріп келеді. Музыканың шынымен де жүректерді біріктіретініне тағы бір дәлел.
